See Also

Monday 28 September 2015

ලංකාවේ උසම දුම්රියපොළ අතර පාගමනින් සංචාරයක - 03 කොටස

දුම්රිය මඟේ උසම ස්ථානයේ සිට ඔහිය දක්වා........


 වැස්සක ළකුණක්වත් නැති අහසේ හිරු මුදුන් වෙලා තිබ්බා.... උදේ කාපු පාන් ටිකටත් අතරමඟදි දිග ඇරුණු ප්‍රභාෂ් මල්ලිගේ චොක්ලට් බිස්කට් පැකට් එකටත් රැවටිලා හිටපු බඩපණුවො  ටික ඔළු උස්සලා බඩවැලේ  අංගුලිකා අස්සෙන් එබිල බලමින් ඊළඟට මොනවද කියලා විමසන මොහොතක වරුණ මල්ලියි, කසුන් මල්ලියි අතරමඟ කෑමට ගෙනාපු රටකජු, බිස්කට් ටික කාට කාටත් අස්වැසිල්ලක් වුණා... ඒත් හැමෝම තමන්ගේ කැමරා ආම්පන්න දුම්රිය පාර දිහාට ඉලක්ක කරගෙන හිටියේ කොයි මොහොතක හෝ දවසේ කොළඹට යන තෙවැනි දුම්රිය ළඟා වනතුරු..... 1008 දුම්රිය එච්චරටම උඩරට මාර්ගයට විශේෂ වෙන්නේ ඇයි කියන කාරණය අපි  පසුගිය ලිපියෙදි කතා කළා... ඒ ලිපිය බලන්න නම් මෙතැනට යන්න. රටකජු - බිස්කට් ටික කාලා පට්ටිපොළ දුම්රියපොළෙන් පුරවගෙන ආපු වතුර එහෙම බීලා හුස්මක් ගන්න අපිට දුම්රියේ නළා හඬ ඇහුණා... 

“1008 එනවා............. දැන්  සමිට් ටනල් ළඟ“ ලොවිඳු මල්ලි කෑ ගැහුවා... 

කැමරා... ඇක්ෂන් ..... රෙඩී.... සියල්ල සූදානම්..... විනාඩි දෙකක විතර කාලයකින් පස්සේ රාජධානි මැදිරියත් එක්ස්පෝ මැදිරියත් නැරඹුම් මැදිරියත් තවත් මැදිරි දෙකකුත් අමුණා ගත්තු අංක දරණ එම් 6 වර්ගයේ එන්ජිම
සහිත බදුල්ල දෙසින් ආ දුම්රිය ඈත වංගුවෙන් මතුවෙලා ලංකාවේ දුම්රියයක් ගමන් කරන උසම තැන පහුකරගෙන කොළඹ දෙසට ගියා..... 


ඊළඟට එක එක්කෙනාගේ කැමරා වල සටහන් වුණු දුම්රියේ ඡායාරූප රස විඳින මොහොත. දක්ෂ ශිල්පියෝ ගොඩක් හිටපු නිසා හොඳ ඡායාරූප කිහිපයක්ම සටහන් වෙලා තිබුණා. වීඩියෝ දර්ශන කිහිපයකුත් තිබුණා. මේ තියෙන්නේ එක් වීඩියෝවක්. 

අඹේවෙල සිට ඉදල්ගස්හින්න දක්වා යන ලංකාවේ ඉහළින්ම පිහිටි දුම්රියපොළ අතර පාගමන් චාරිකාවක යෙදුනු MegaaHike පිරිවරේ චාරිකා සටහන අද ඇරඹෙන්නේ සමිට් ලෙවල් සිට ඔහිය දක්වා කොටසේ 
වැදගත්කම සොයාගෙනයි. 

 සම්පූර්ණ ලිපිය මෙතැනින් කියවන්න.

Sunday 2 August 2015

MegaaHike - රජ මාවත දිගේ අවාරේ සිරිපාදේ යමු

ලංකාව තුළ ජීවත්වෙන සැම ආගමිකයෙක්ම තමන්ගේ ආගම හෝ ජාතිය බාධාවක් කර නොගෙන දුෂ්කර කඳු නැඟීමකින් ළඟාවෙන සුන්දර වන්දනා බිමක් තමයි ශ්‍රිපාදය. අතීත රජ සමයේ පටන්ම ශ්‍රි පාදය ලාංකිකයින්ගේ වන්දනාවට, ගරු බුහුමනට ලක් වුණා. ආගමික වැදැගත්කමට අමතරව අනර්ඝ පාරිසරික වැදැගත්කමකුත් සිරිපාදයට තියෙනවා.... අක්කර දහස් ගණනක් පළාත් දෙකක්, දිස්ත්‍රික් තුනක් පුරා පැතිරෙන රක්ෂිත වැසි වනාන්තරය, පරිසරය විසින් ගිලගත් ගිලීමලේ, මුක්කුවත්ත, එරත්න, සිරිපාගම වගේ මිනිස් වාස, කළු, කැළණි, වලවේ වගේ ලංකාවේ ප්‍රධාන ගංගා කිහිපයක ඇරඹුම සිද්ධවෙන මේ අසිරිමත් භූමිය.... අවුරුද්දේ මාස හයක් පුරාවටම පාළුවට යනවා.... අතීත යේ සිටම ඇතිකරගත් වාරණයක් මඟින් ඒ කාලය සිරිපා බිමට අවාරය උදා කරනවා.... ඒත් වැස්සෙන් සහ සුළඟින් සිරිපා බිම නැවුම් වන  මේ අවාරය තිස්තුන්කෝටියක් දෙවිවරු අතරින් දහස් ගණනක් වන සම්‍යදෘෂ්ඨික දෙවියන්ගේත්, නිස්කලංකභාවයට රුචි බුදු සසනේ සිව් වනක් පිරිසෙන් කොටසකගේත්, පාරිසරික සුන්දරත්වය විඳින සංචාරකයින්ගේත්  පාදස්පර්ශයෙන් සමන්විතයි. 

ටිකක් වෙනස් ආරක ගවේශන සංචාර සිදුකරන MegaaHike කණ්ඩායමේ අපිත් මේ අවාරයේ පාරිසරික සුන්දරකත්වය විඳින අතරතුර සිරිපා සිරිත ගැන තොරතුරු ගවේශනය කරන්නත් හිතාගෙන 2015 අගෝස්තු මාසෙ 28-29-30 කියන දවස් තුනේ අවාරයේ සිරිපා වන්දනාවක යෙදෙන්න බලාපොරොත්තු වෙනවා. මේ චාරිකාව සංස්කෘතිය අතික්‍රමණය කරණය කරන්නට දරණ උත්සාහයක් වත් සිරිපා බිම හා බැඳුනු හාස්කම් ගැන අවතක්සේරු කරන උත්සාහයක් වත් නොවෙයි. ඒ බිම හා බැඳුණු අතීත ශ්‍රී විභූතිය ගැන සැඟවී යන තොරතුරු ගවේශනය කරන  නොදන්නා තොරතුරු මතුකෙරන අපූරු චාරිකාවක්.... 

2015 අගෝස්තු 28 දා උදේ 8ට කොළඹ කොටුවෙන් ඇරඹෙන මේ ගමනෙ පළමු නවාතැන වෙන්නේ රත්නපුර මහ සමන් දෙවොල. වැඩසටහන සඳහා අවශ්‍ය දේවාශිර්වාදය ලබාගන්නා අපි සමන් දෙවියන් වෙනුවෙන් පූජාවකුත් පවත්වලා දහවල් 2 විතර වෙද්දි පලාබද්දලට යන්න තමා බලාපොරොත්තුව. එදා සවස් වරුව ගමේ වැදගත් තැන් වල විස්තර විමසන අපි පසුවදා 29දා  පාන්දර පළාබද්දල රජමාවත දිගේ සිරිපා කරුණාව ආරම්භ කරනවා... එදා සවස මළුවට ළඟාවෙන අපි සුදුසු තැනක නවාතැන් අරගෙන 30දා උදේ ඉර පායන හැටි උඩමළුවේ ඉඳන්ම නරඹලා  පහළ බහින්න පටන්ගන්නවා... එදා රාත්‍රීයේ කොළඹට ඇවිත් අපේ වැඩසටහන අවසන් කෙරෙනවා..... 

ගමනෙදි කොළඹ සිට ගමන් පහසුකම් - පුදපූජා - මඟපෙන්වීම්- ආහාර පාන සහ නවාතැන් සියල්ල සැළැසුම් වෙනවා... 29 පෝදා නවාතැන් නම් අවස්ථානුකූලව සපයා ගන්න වෙනවා. සම්පූර්ණ ගවේශන වැඩසටහන ට අදාළව වීඩියෝ තැටියක් නිර්මාණය වෙනවා. ඡායාරූප සියයක ගොනුවකුත් නිර්මාණය වෙනවා. ඊට අමතරව වර්ශාවේදි බාධා නොවෙන විශේෂ විනිවිද පෙනෙන වැසි ආවරනයකුත් සපයන්න බලාපොරොත්තු වෙනවා...මේ හැම දෙයක්ම වෙනුවෙන් උපරිමය රුපියල් 4000/= විතර එක් අයෙක්ගෙන් වැය වේවි කියා අනුමාන කරනවා. 

ඒ ගනණය කිරීම් සකසා ඇත්තේ දොළොස්දෙනකු සහභාගී වේ යැයි සළකා බලා.... ඔබත් යන්න කැමැති නම්  හැකි ඉක්මනින් අපේ ඉවෙන්ට් පිටුවට ගොස් සටහනක් තබන්න. හැමදාමත් යන චාරිකා වලින් ටිකක් වෙනස් මේ ගමනට ඔබත් එනවා නම් මම කැමැතියි.....වැඩි විස්තර දැනගන්න 076-6642607 අංකයට කතා කරන්න. නැත්නම් කෙළින්ම  මේ සම්බන්ධ පිටුවට යන්න. 



Saturday 18 July 2015

ලංකාවේ උසම දුම්රියපොළ අතර පාගමනින් සංචාරයක -02 කොටස

උදේ 4ට පට්ටිපොළට ළඟාවෙන කොළඹින් බදුල්ලට යන රාත්‍රී තැපැල් දුම්රියට පසු යළිත් බදුල්ල දෙසට ධාවනය වන ප්‍රථම දුම්රිය  පට්ටිපොළට ළඟාවෙන මොහොතෙම තමා පාගමනින් ආව අපිත් පට්ටිපොළ දුම්රිය වේදිකාවට ගොඩවුණේ.... සාමාන්‍යෙයන් උදේ 10.15ට පට්ටිපොළට ළඟාවන දුම්රිය මෙදා ඊට පැයකට පස්සේ තමයි පට්ටිපොළට ළඟාවුණේ... ඒ නිසා සාමාන්‍යෙයන් ඔහියෙන් එකිනෙක මාරුවන කොළඹට යන පොඩිමැණිකේ දුම්රිය මෙදා පට්ටිපොළෙන්  එකිනෙකා මාරුවෙන්නට නියමිතව තිබුණා.... සංඥා සහ මාර්ග ගත කිරීම් නිවැරදිදැයි බැලීමට එහි දුම්රිය ස්ථානාධිපතිවරයා වේදිකාවට ඇවිත් හිටියා.... පසුගිය ලිපියේ අවසානයට දක්වා තිබුණු දුම්රියපොළේ කළබලකාරීත්වයට හේතුව ඒක තමා....පළමුවෙන් පැමිණි 1132 දුම්රිය එදා අමුණලා තිබුනේ අංක 788 දරණ එන්ජිමට.... තෙල් ටැංකි තුනක් බඩුපෙට්ටියක්..  සහ සාමාන්‍ය මඟී මැදිරි තුනක් අමුණගෙන ආව දුම්රිය එදා දෙවැනි වේදිකාවට තමයි යොමු කෙරුණේ...  නානුඔයෙන් පස්සේ මෙම මාර්ගයේ දුම්රිය ස්ථානවල එක් වේදිකාවක් පමණක් තිබෙද්දි පට්ටිපොළ විතරක් වේදිකා දෙකක් තිබුණා...එහෙම වුණේ පසුකාලීනව මෙහෙයුම් කටයුතු සඳහා ඉදිකළ තාවකාළික පස් ගොඩැල්ල වේදිකාවක් බවට පරිවර්තනය වීම නිසා.... තහවුරු කළ ආරංචි පවසන්නේ මෙම වේදිකාව පසුගිය වසර 20 ඇතුළත  ඉදිවූ එකක් බවයි. 1132 දුම්රියෙන් මඟින් 25ක් පමණ බැස ගිය අතර දහයකට අඩු පිරිසක් ගොඩවුණා... උඩරට මැණිකේ දුම්රියට විදේශිකයින් ඇතුළු පහළොවක පමණ පිරිසක් ගොඩවෙද්දි ඒ හා සමාන පිරිසක් බැස ගියා....


    ලෝකයේ විවිධ රටවල දුම්රිය සේවා ක්‍රියාත්මක වනවා... මේ රටවල දුම්රිය මාර්ගයේ පීළි අතර අභ්‍යන්තර පරතරය එකිනෙකට වෙනස්....  1864 දි ලංකාවේ දුම්රිය මාර්ගය ඉදිවන්නේ එවකට ඉන්දියානු දුම්රිය මාර්ග 
සඳහා සම්මත අගය ලෙස සැලැකූ  පළල අඩි 5කුත් අඟල් 6ක් ලෙසටමයි.  එම පීළි අතර පරතරයේ සම්මතය Indian Board Guage ලෙස හඳුන්වනවා.... මෙයට අමතරව අඩි 2 අගල් 6 ක් පරතරය තියෙන පටු මාර්ගය කුත්  අපේ රටේ අතීතයේ ක්‍රියාත්මක වුණා.... ඒ කැළණිවැලි, සබරගමු සහ උඩුපුස්සැල්ලාව දුම්රිය මාර්ග වල....එය  762mm Narrow Guage නමින් තමයි හැඳින්වූවේ.   Indian Board Guage දුම්රිය මාර්ග ක්‍රියාත්මක වන ලෝකයේ උසම දුම්රිය මාර්ගය තියෙන්නේ ලංකාවේ.... ඒ අනුව Indian Board Guage මාර්ගයක පිහිටා ඇති ලෝකයේ උසම දුම්රියපොළ තමයි පට්ටිපොල. ලංකාවේ ඉහළින්ම පිහිටි දුම්රියපොළ අතර පාගමන් චාරිකාවක යෙදුනු MegaaHike පිරිවරේ චාරිකා සටහන අද ඇරඹෙන්නේ එවන් සුවිශේෂ වටිනාකම් තියෙන පට්ටිපොළ දුම්රියපොළෙන් ඉදිරියට ඔහිය බලා ගිය  ගමනේ  තොරතුරුත් එක්ක..... 

සම්පූර්ණ ලිපියට මෙතැනට යන්න. 



Friday 19 June 2015

Megaa Hike - 01st Step Kalutara - Aluthgama කළුතර සිට අළුත්ගමට ගවේශන චාරිකාව

ලංකාව පුරා විවිධ තැන් වල යන ගොඩක් දෙනා නොහිතන අපූරු වැඩකට මුල් පියවර තියන්න තමයි මේ සූදානම..... ලංකාව පුරා යන අපි මෙච්චර කල් හිතුවෙ නෑ....
දූපතක් වන අපේ රටේ වෙරළ දිගේ රට වටේම යන්න........
හැමදාමත් මාසෙකට දෙකකට සැරයක් රටේ කොහේ හරි අස්සක මුල්ලක ඇවිදින මට ළඟදි ලංකාව වටේ යන්න අදහසක් ආවා.... ලංකාව වටේ වෙරළ තීරයට සමීපයෙන් ප්‍රධාන මාර්ගයෙන් හෝ අතුරු මාර්ග වලින් දිගින් දිගටම යන මේ ගමනෙදි වෙරළ මායිමේ තියෙන පාරිසරික සුන්දරත්වය දෑසින් - තෙවැනි ඇසින් නරඹන - සටහන් කරන ගමන් සංස්කෘතිකමය අතින්- ඓතිහාසික අතින් - සමාජමය වශයෙන් වැදගත් තැන් ගණනාවක් ගැනත් අධ්‍යයනයට සූදානම්.....
රට වටේම වෙරළ දිගේ කිලෝමීටර 1600ක් විතර යන්න තියෙන මෙම වැඩසටහන පියවර ගණනාවකින් තමයි සම්පූර්ණ වෙන්නේ.... ඒ අනුව පළමු වැඩසටහන ක්‍රියාත්මක වෙන්නේ කළුතර සිට අළුත්ගමට.... ඒ ලබන ජූලි 25- 26 දවස් දෙකේදි.... 24දා හවස කළුතරට එකතු වන සහභාගී වන පිරිස සමඟ රාත්‍රී නඟර සංචාරයකුත් සැළසුම් කරලා තියෙනවා..... 25දා අළුයම 6ට ඇරඹෙන අපේ වැඩසටහන එදින සවස් වන විට බේරුවල දක්වා ළඟා වෙනවා....එදින රාත්‍රිය බේරුවල ගත කරන අපි පසුවදා අළුත්ගම දක්වා ගමන් කරනවා.... අළුත්ගමින් සවස 5ට විතර වැඩසටහන ඉවර කරලා ආපසු නිවෙස් කරා යනවා...
විනෝදය සමඟ බැඳෙන බොහෝ සංචාර වලට සාපේක්ෂව මේ වැඩසටහන හොඳ අධ්‍යයන චාරිකාවක්.... ඒත් මේ තුළත් විනෝදය - රස වින්දනය සමඟ නැවුම් අත්දැකීම් රැසක් ලැබෙන විදියට තමයි සංවිධානය වෙන්නේ.... නිකම්ම නිකම් වෙරළ දිගේ යනවට අමතරව කළුගඟේ සහ කැළිඩෝ වෙරළ ආශ්‍රිත ආරක්ෂීත බෝට්ටු සවාරි - ප්‍රදීපාගාරයක පැය කිහිපයක් ගත කරන්නට අවස්ථාව වගේම පුංචි දූපතක පැයක් විතර කාලයක් ගෙවා දමන්නත් සැළසුම් කරලා තියෙනවා......
ඒවගේම තනිවම යන සංචාරයකදී කවදාවත් අත්විඳීමට නොලැබෙන බොහෝ දේ දැකගැනීමටත් මේ වැඩසටහන සමඟ සම්බන්ධ වන ඔබට අවස්ථාව ලැබෙනවා...
පොළොන්නරුවේ රජකළ විජයබාහු රජු බේරුවල පෙරියමරික්කාර්ට ලබාදුන් තඹ සන්නස පවා මෙම වැඩසටහනට සහභාගී වන ඔබට දැක බලාගන්න ලැබෙනවා...
ඒ විතරක් නොවෙයි අපි පොඩි කාලයේ වරදක් කරපුවහම අම්මලා අපිව යවන්න හදපු මග්ගොන “විසේන්ති ළමා නිවාසය“ ටත් , පයාගල කල්වාරි කන්ද නඟින්නත් අපි යනවා.... ඒ වගේම ලාච්චු විදියට හදපු අපූරු සොහොනක් මග්ගොන තියෙනවා.... අපි ඒකත් බලනවා.....

මේ සියල්ල අදාළ අංශ වල අවසරය සහිතව සංවිධානය කෙරෙන අතර බෝට්ටු සවාරි වලදී අවශ්‍ය ආරක්ෂිත පියවරයන්ද අනුගමනය කිරීම සිදු වෙනවා..... කළුතර ජ්‍යෙෂ්ඨ පොලිස් අධිකාරී කාර්යාලය - සහ පළාත් පාළන ආයතන සමඟ සම්බන්ධ වෙමින් සංවිධානය කෙරෙන මෙම වැඩසටහන මායා ක්‍රියේෂන්ස් ආයතනයේ මැදිහත්වීම මත වීඩියෝ වැඩසටහනක් බවටත් පරිවර්තනය වෙනවා.....
දොළොස් දෙනෙකුට උපරිමව පහසුකම් සංවිධානය වන මේ වැඩසටහනෙදි කෑම, නවාතැන් හා ගමනාගමන පහසුකම්( වෑන් රථයක් සහ බෝට්ටු සවාරි) පෙර සැළසුම් කෙරෙනවා.... පැමිණෙන හැමෝටම වැඩසටහනේ වීඩියෝ තැටියකුත් ලැබෙනවා.... මේ සියළු වියදම් සමඟ සම්පූර්ණ වැය වීම රුපියල් 4200/-කට සීමා වේවි. ඒ දොළොස්දෙනකු සහභාගී වේ යැයි සළකා බලා.... ඔබත් යන්න කැමැති නම්  හැකි ඉක්මනින් අපේ ඉවෙන්ට් පිටුවට ගොස් සටහනක් තබන්න.
හැමදාමත් යන චාරිකා වලින් ටිකක් වෙනස් මේ ගමනට ඔබත් එනවා නම් මම කැමැතියි.....වැඩි විස්තර දැනගන්න 076-6642607 අංකයට කතා කරන්න. නැත්නම් කෙළින්ම මේ සම්බන්ධ පිටුවට යන්න. 

අඹේවෙල - ඉදල්ගස්හින්න දුම්රිය මාර්ග චාරිකාව Ambewela- Idalgashinna Rail Hike

 සති ගණනක් පුරා කොළඹ වැසියන්ගේ ගතට වෙහෙස ගෙන දුන් දැඩි අව් රශ්මිය පහවෙලා ගිහින් වැහි වැටෙන්න පටන් අරන්..මාසයක විතර ඉඳලා කරපු සැලසුම වතුරෙ ගහගෙන යන්න නොදී මොර සූරන වැස්සට යටින්  ගමනට නියමිත හැම දෙනාම මරදාන දුම්රිය පොළට ආවේ රාත්‍රී තැපැල් දුම්රිය අල්ලගන්න. සිකුරාදා දවස ටිකක් විතර සෙනඟ වැඩි දවසක් වුණත් දුම්රිය නවත්තන මොහොත වන විට ගොඩක් දෙනා දුම්රියට ගොඩ වෙන්න තෙරපුණේ නැත්තේ නොනවතින වැස්ස බොහෝ දෙනාගේ කටයුතු අඩාල කරලා තිබ්බ නිසා වෙන්න ඇති. විනාඩි දහයක පහළොවක පමාවෙන් පස්සේ  කිටි කිටියේ තදවෙන්න තරමට  දුම්රියට නැඟුණු පිරිසත් සමඟ බදුල්ල ට යන දුම්රියේ ඉදිරියට ඇදුණු අපි යළි යළි ඇහැරෙන කුක්කුට නිද්‍රාවන් කිහිපයක සුවයකින් පස්සේ අළුයම පහ විතර වෙද්දි අඹේවෙලට ළඟාවුණා..... දුම්රිය ස්ථානාධිපතිතුමාගේ අවසරයෙන් විවේක කාමරයට වෙලා බිමට එළිය වැටෙනකම් ගතකරපු අපි උදේ හයට විතර දවසේ වැඩ ආරම්භ කළා. 


සම්පූර්ණ ලිපියට මෙතැනින් යන්න. 


කොළඹ සිට අඹේවෙලට... අඹේවෙල සිට පාගමනින් පට්ටිපොලට